Act 25 | MHL | STEP | Aria Festus anim onoma maneka ikiwep kame nain wiar kererek. Ne fofa arow owow maneka Sisaria-pa ikok Yerusalem ikiwok.

Acts 25

Pol Siisar wiarik opora-pa efa wueka naek

1 Aria Festus anim onoma maneka ikiwep kame nain wiar kererek. Ne fofa arow owow maneka Sisaria-pa ikok Yerusalem ikiwok. 2 Ikiwep nan ikaeya wi pris woos mua ne wi owow woos mua-ke wiar ekapep Pol kiiriw nainiw opora-pa wuami opora nain maakemik. 3 Ne maakemik, “I feenap kookalimik, Pol sesekeya Yerusalem feek i yiar ekapinok,” naap maakemi sisewaremik. Ne wi iiriw kokot aakunep i era-pa luus inep ikok Pol ifakimiyen naemik. 4 Ne aria Festus-ke wia maakek, “Pol Sisaria owowa-pa koora ekap ikua, ne yena pun ikoka kirep neek ikiwinen. 5 Naapeya ni niena woos mua wia sesekiwkin efamiya ikiwuk. Ne mua nain sira-ko samoreya-na eliw opora-pa wuauk,” naap wia maakek.

6 Aria Festus Yerusalem-pa nan fofa ten kuisow-i e ikur okaiwi-pa arow naap wiamiya ikok kiiriw Sisaria owowa kirep ikiwok. Ikiwep nan ikok uurik ona-pa opora wiar miimekam naep wia maakek, “Pol poreka.”

7 Ne aria Pol poriwkin wi mua Yerusalem-pa ekapemik nain o warikap ikok opora maken marewa nain opor unu-unowa mikamik. 8 Naapeya opora wia kiripomami maek, “Yo yiena Yuuda sira ne tempel koora sira me-ko puukam, ne Rom saria maneka sira wuak nain pun me wiar puukam, weetak akena,” naap maek. 9 Naap maeya Festus wi Yuuda kema tenuk naep Pol nokarek, “No kamenap kookalin? No opora-pa nefa wuamik nain eliw ikiwep Yerusalem owowa-pa ikok nainiw nefar miiminen-i?” 10 Naeya maek, “Yo aakisa Rom saria maneka Siisar ona opor miimow koora-pa wiar iimarep ikem, ne yo feeke opora-pa efa wuowa nain-ke ikua. No efa amisaren, yo Yuuda sira-ko me wiar puukam. 11 Ne yo sira-ko puukamkun-na efa ifakimu naep-na eliw efa ifakimuk. Yo opora-pa efa wuamik nain opora onom marew, naapeya yo mua oko wapena-pa efa wuowa nain me pepek. Yo Rom saria maneka Siisar tepak-pa wiar ikem, ne ikoka o wiar ikiwemkun opora-pa efa wuauk.” 12 Naap maeya Festus ona uuwow teeria mua papako wiamiya aakunep welawap maakek, “Aria no Siisar wiarik opora-pa efa wueka naen, eliw, ikoka o wiar nefa sesekamkun neek ikiwinan,” naap maek.

13 Aria naap ikok owow saria Agripa naimik nain ona wekera Benaisi ikos Festus karuep urufamik. 14 Ne nan lawisiw inem-ikemik. Naeya Festus Pol opora-pa wuamik nain Agripa maakek. Feenap maakek, “Mua oko iiriw Feliks-ke koora-pa wuak nain fan ikua. 15 Yo iirakuma fan Yerusalem ikiwemkun wi Yuuda pris woos mua ne wi owow woos mua unow onaiya efar kererep mua nain opora-pa wuami ifakime, eenap efa maakemik. 16 Ne yos-ke wia maakem, ‘I Rom sira naap yiar ikua, mua oko opora-pa wia wuiwkin mua nain ona opora pun aakuneya i opora wiar miimap opor onoma wiar imenap mua nain samorowa-ke ikua,’ naap wia maakem.

17 Ne wi ekapep fan kereriwkin yo epa me ekam, uurik ona naap yo fiirimowa wuami mua nain poreka wia naakem. 18 Yiam fiirimep ikok wi mua opora-pa wuamik nain-ke iikirap o sira kamenap onak nain maemik, ne yo-ko sira samora-ko oneya aakunemik naem-na weetak. 19 Wi wiena lotu sira muuta nain riirinemik, ne mua oko iiriw umok nain unuma Yeesus, nain Pol-ke maek, ‘O mokok enuma ikua.’ Naap maeya wi riirinemik. 20 Ne opor onoma nain yo momora ikem. Ne o nokarem, ‘No Yerusalem ikiwep neeke aakuneya yo opor onoma nefar amisarinen-i e weetak?’ 21 Naap maakemkun os-ke maek, ‘Weetak, yo feenap ikok iiwawun Rom saria maneka Siisar wiar aakuninen’ naek. Naap maeya koora-pa wuap-puam, ikoka Rom saria maneka Siisar wiar sesekamkun ikiwinok.” 22 Festus-ke naap maakeya Agripa-ke maek, “Naap nain yo mua nain opora-ko wiar miiminen.” Naeya maakek, “Eliw, uurika opora wiar miime.”

23 Aria uurik ona Agripa, Benaisi ikos maa bala eliwa wuap koora-pa oraiwkin mua unowiya gone wia wuap fiirimow koora wia purupemik. Ne wi ami woos mua maneka ne wi owow woos mua pun wiokap urupemik. Wi urupep nan ikaiwkin Festus-ke Pol purupeka wia naakeya purupemik. 24 Purupiwkin Festus opora wafurak, “Saria maneka Agripa, ne ni unowiya fan yiamiya ikeman nain ni mua fain amisareman. Wi Yuuda fan ikemik nain ne Yerusalem-pa ikemik nain o wameiya irakep yo efar kererep efa kirirowami maemik, ‘Ifakimeya uminok akena’ naemik. 25 Ne o ifakimowa nain sira samora-ko me wiar imenam. Ne ona maek, ‘Yo Siisar wiarik opora-pa efa wuauk.’ Naeya ikoka Siisar wiar sesekinen. 26 Ne o sesekami opor onoma onaiya me sesekinen-na yiena saria maneka Siisar o opor onoma kamenap wiar amisarinon. Sira naap-ko me ikua. Naapeya o aakisa no saria Agripa ne ni unow onaiya wapena-pa niar wuiyem. Ne o opora aakuneya opor onoma balisow wiar aawiwkin yo parosifa siisimep feekiya sesekinen.”